Birtingarmynd svefnvanda eftir áföll

0

Vitað er að áföll geta haft alvarlegar afleiðingar í för með sér eins og áfallastreitu, kvíða og þunglyndi. Svefnvandi er einnig algeng afleiðing áfalla. Birtingarmynd svefnerfiðleika getur verið fjölbreytt, eins og t.d. að eiga erfitt með að sofna, upplifa martraðir eða kvíðaköst á nóttinni eða bregðast líkamlega við draumum sínum (s.s. að öskra, kýla frá sér eða sparka í svefni).

Í rannsókn sem birtist nýlega í vísindatímaritinu Sleep könnuðu dr. Edda Björk Þórðardóttir og samstarfsfélagar hennar birtingarmynd svefnvanda hjá þolendum snjóflóðanna í Súðavík og á Flateyri árið 1995, 16 árum eftir að snjóflóðin féllu.

Niðurstöður rannsóknarinnar gefa vísbendingu um að svefnvandi eftir áföll geti verið langvinnur og að birtingarmynd vandans sé ólík eftir því á hvaða aldri þolendur eru þegar áfall á sér stað.

Þolendur, sem voru börn (2-12 ára) þegar að snjóflóðin féllu eru meira en tvisvar sinnum líklegri til að þjást af svefnvandamálum sem tengjast áfallastreitu á fullorðinsárum en jafnaldrar þeirra sem ekki lentu í snjóflóðunum. Sú birtingarmynd sem er hvað algengust er líkamleg viðbrögð við draumum sínum, t.d. að öska, kýla eða sparka frá sér í svefni. Á hinn bóginn voru þolendur sem upplifðu í snjóflóðunum á fullorðinsaldri líklegri til að upplifa áfallatengdar martraðir, miðað við einstaklinga sem ekki lentu í snjóflóðunum.

Rannsóknin er sú fyrsta sem kannar áhrif áfalla á svefnvanda eftir þroskaskeiðum en frekari rannsóknir eru nauðsynlegar til að kanna nánar þetta samband.

 

 

 

Share.

About Author

Edda Björk Þórðardóttir

Dr. Edda Björk er með doktorsgráðu í lýðheilsuvísindum og með bakgrunn í sálfræði. Hún starfar sem nýdoktor við Háskóla Íslands og sinnir kennslu við þá stofnun. Helstu rannsóknir hennar eru á sviði áfallafræða.

Fara í tækjastiku