Hollt mataræði tengt betri vitsmunagetu barna

0

Það kemur sífellt betur í ljós að það er mataræði í heild sinni sem skiptir mestu máli en ekki einstaka næringarefni eða fæðutegundir. Það þýðir lítið að borða einn banana á dag en borða svo óhollt restina af deginum (þó að bananinn sé ákveðin viðleitni í rétta átt). Nú þegar skólarnir eru að hefjast er ekki úr vegi að segja frá nýrri rannsókn á yfir fjögurhundruð finnskum börnum á aldrinum 6-8 ára sem birtist í the British journal of nutrition. Í stuttu máli sýndi sú rannsókn að gæði mataræðis hefur áhrif á vitsmunalega getu, sérstaklega meðal drengja.

Gæði mataræðis

Mataræði barnanna var metið með fjögurra daga skráningu og því næst athugað hvort gæðin væru nálægt gæðum mataræðis sem kallast „DASH“ mataræði annars vegar og „the Baltic Sea“ mataræði hins vegar. Bæði þessi mataræði (DASH og Baltic Sea) einkennast af mikilli neyslu á ávöxtum, berjum, grænmeti, heilkornavörum, fiski og mjólkurvörum með lágu fituinnihaldi en lítilli neyslu af rauðu kjöti og unnum kjötvörum.

Börnin sem borðuðu í samræmi við þessi heilsusamlegu fæðumynstur (DASH og Baltic Sea) sýndu betri árangur í prófi sem reyndi á vitsmunalega getu. Þegar niðurstöðurnar voru skoðaðar eftir kynjum var sambandið einungis marktækt fyrir drengi.

Höfundar rannsóknarinnar telja að mataræði geti haft áhrif á þroska heilans en hingað til hefur meira áhersla verið lögð á að skoða samband mataræðis við vöxt, líkamsþyngdarstuðul og ýmsa sjúkdóma. Hægt er að skoða nánari umfjöllun um rannsóknina hér.

Vatnsdrykkja skiptir líka máli fyrir vitsmunalega getu

Önnur nýleg rannsókn sem gerð var á stórum hópi barna og unglinga í Bandaríkjunum sýndi að helmingur þátttakenda var með einkenni ofþornunar.

Það að vera ekki nægjanlega vel „vökvaður“ veldur einkennum eins og höfuðverk, pirringi, minnkaðri líkamlegri getu sem og verri vitsmunalegri getu.

Við þessu er mjög auðvelt að bregðast með því að drekka meira vatn yfir daginn. Samkvæmt ráðleggingum frá Embætti landlæknis eiga öll skólabörn að eiga greiðan aðgang að drykkjarvatni.

Fjölbreytt og reglulegt mataræði þar sem aðgangur að drykkjarvatni er mögulegur reglulega yfir daginn hefur áhrif á hegðun og lærdómsgetu barna.

Share.

About Author

Jóhanna Eyrún Torfadóttir

Dr. Jóhanna er löggiltur næringarfræðingur og doktor í lýðheilsuvísindum. Hún starfar sem rannsóknarsérfræðingur hjá Miðstöð í lýðheilsuvísindum við Háskóla Íslands og sem fræðslufulltrúi hjá Krabbameinsfélagi Íslands.

Fara í tækjastiku