Að eiga eða upplifa: Hvaðan kemur hamingjan?

0

Á að eyða pening í verslunarmiðstöð um helgina eða nota peninginn í upplifun? Hvað segja vísindin okkur um hvort veitir okkur meiri hamingju?

Rannsóknir sýna að sækist maður eftir meiri hamingju þá ætti maður að eyða peningnum í upplifun frekar en dót eða dauða hluti. Sálfræðingar segja að flestir aðlagast nýjum kaupum á 6-8 vikum og allt að 3 mánuðum og þá er hamingjan tengd hlutnum farin. Upplifun, á annað borð, heldur áfram að gefa af sér hamingju í gegnum minningarnar löngu eftir að atburðurinn átti sér stað.

Rannsókn var gerð á 154 einstaklingum (1) sem svöruðu spurningum um hvað þau hefðu eytt peningunum í til að gera sér glaðan dag síðustu þrjá mánuði. Niðurstöðurnar voru þær að flestir urðu almennt hamingjusamari með það sem þeir eyddu peningunum í án tilliti til hver hluturinn eða upplifunin var. Þau sem sögðust hafa eytt í upplifun sýndu meiri ánægju bæði á þeim tíma sem kaupin fóru fram og eftir að upplifuninni lauk.

Og það sem meira var er að upplifunin jók ekki einungis hamingju þeirra sem eyddu í upplifun heldur einnig hjá þeim sem voru í félagsskapnum með þeim.

Með því að eyða í upplifun höfum við þannig ekki einungis jákvæð áhrif á okkar eigin vellíðan heldur einnig jákvæð áhrif líf þeirra sem standa okkur næst. Svipuð áhrif hafa verið sýnd í fleiri rannsóknum (2).

En af hverju veitir upplifun meiri hamingju sem endist lengur?

Nokkrar skýringar hafa verið lagðar fram:

  • Þegar við upplifum eitthvað nýtt þá erum við oftast í félagsskap með öðrum og tilfinningin um að tilheyra öðrum, verða nánari vinum eða ættingja veitir okkur gleði. Upplifun uppfyllir þannig þörf okkar fyrir félagslegum tengslum sem er einn grunnþáttur heilsu.
  • Við upplifun kemur fram sterk tilfinning hjá okkur þar sem við finnum fyrir lífskrafti. Það að finnast maður vera á lífi eykst á meðan upplifun stendur og einnig í endurminningum. Eins fín og þér finnst nýja tölvan þín að þá mun hún ekki láta þér finnast þú vera fullur af lífi, fylltur lífsþrótti.
  • Þegar við eyðum tíma okkar í upplifun þá erum við minna að bera okkur saman við aðra en þegar við eyðum í hluti. Ef athygli okkar er á hlutum en ekki upplifun þá truflar það okkur líklega meira ef vinur okkar á flottara sjónvarp eða græjur, heldur en ef að hann hafi farið í hellaferð í fríinu sínu en við í fjallgöngu.
  • Upplifun býr til öflugar og dýrmætar minningar sem við getum ekki hugsað okkur að skipta út fyrir neitt.

Það að upplifun auki hamingju á ekki einungis við um einstaklinginn heldur samfélagið í heild sinni. Við þurfum að halda áfram að byggja hjólreiðastíga, göngustíga ásamt því að bæta aðgang að náttúrunni til að gera upplifun auðveldari. Þá munum við í leiðinni uppskera hamingjusamara samfélag.

Það kostar vissulega meiri orku og tilstand að skipuleggja upplifun en bruna í verslunarleiðangur en líklega er það þess virði. Auk þess þarf upplifun ekki að kosta neitt og hamingjan þannig séð ókeypis!

Share.

About Author

Lára G. Sigurðardóttir

Dr. Lára er læknir og doktor í lýðheilsuvísindum. Hún er jafnframt annar höfundur bókanna "Útivist og afþreying fyrir börn" og Reykjavik With Kids."

Fara í tækjastiku